Նպաստառուների համար գազի վճարման գինը թանկացրել են, այսպես ասած՝ ներքին կարգով «սղացրել» են: Այս մասին Tert.am-ի հետ զրույցում ասաց Լոռու մարզի բնակիչը, ով խնդրեց ապահովել անձի գաղտնիությունը:

Բնակիչը ներկայացրեց, որ նպաստառու է. նպաստառու ընտանիքները գազի համար 1 խորանարդ մետրի դիմաց պետք է վճարեին 80 դրամ, սակայն հիմա, ըստ նրա, գաղտնի կարգով գինը բարձրացվել է և դարձել 100 դրամ:
«Հեղափոխությունից հետո, օգոստոսի 1-ից էլեկտրաէներգիան 40 դրամից 30 իջեցրին, գազն էլ՝ 100-ից 80 դրամ: Հիմա գազի գինը նորից բարձրացրել են: Չգիտեմ, թե նրանց ընթացակարգն ինչպիսին է, եթե 5 դրամ իջեցնեին, աշխարհով կպատմեին, բայց 20 դրամ թանկացրել են՝  որևէ մեկը տեղյակ չէ: Վճարողը վճարման օրը՝ փոստում կամ բանկում է իմանում, որ 80-ի փոխարեն 100 պետք է վճարի»,- ասաց բնակիչը:

Նրա խոսքով՝ հանրային ծառայությունների կարգավորող հանձնաժողովի նախագահ Գարեգին Բաղրամյանին է դիմել, ով ասել է, որ 100 դրամն այսուհետ նպաստառուների համար ֆիքսված է, իսկ մնացածի համար՝ 139 դրամ: Բաղրամյանը բնակչին նաև պարզաբանել է, որ «Գազպրոմ Արմենիա»-ն իր նախաձեռնությամբ է գինն իջեցրել 80 դրամի:
Բնակիչը նկատեց, որ մարզում 90.000-100.000 նպաստառու ընտանիքներ կան, որ նույն խնդրի առաջ են կանգնած: «Ճիշտ չէր չքավոր խավի համար գին բարձրացնելը: Իրենց բարձրացրած գնով ամսական միայն սուրճ եփելու համար կարող ենք վճարել»,-նշեց բնակիչը:





























































































































































Աղբյուր՝ https://www.tert.am/am/news/2019/11/09/Gaz/3136985