«Ռեստարտ» նախաձեռնությունը ԱԱԾ շենքի մոտ այսօր բողոքի ակցիա իրականացրեց: Մասնակիցների համոզմամբ՝ առանց ԱԱԾ-ի, Ոստիկանության, Դատախազության և դատարանների արմատական փոփոխությունների Հայաստանում հեղափոխությունը չի կարող ավարտված լինել: Նրանք նշեցին, որ սկիզբ են դնում նոր նախաձեռնության: Լրագրողները հետաքրքրվեցին, թե արդյոք ֆինանսավորվել էլ են իրենք «Բաց հասարակության հիմնադրամներ–Հայաստան» գրասենյակից: Նախաձեռնության անդամներից Յուրի Ավագյանը հայտարարեց. «Մենք «Բաց հասարակություններ հիմնադրամից» ստացել ենք 20,000 դոլար գրանտ: Դա հետազոտության երկու ուղղությունների՝ պետական բուհերի կառավարման համակարգի և ձեռնարկատիրական գործունեության համար է տրվել: Ուսումնասիրություն ենք արել»: Նախաձեռնության անդամներից Դավիթ Պետրոսյանն էլ հավելեց, որ «Ռեստարտ» նախաձեռնությունը չի համագործակցում միայն «Բաց հասարակություններ հիմնադրամի» հետ: Նրա խոսքով՝ «Ռեստարտ» նախաձեռնությունը համագործակցում է և համագործակցելու է բոլոր այն տեղական և արտասահմանյան կազմակերպությունների հետ, որոնք շահագրգռգված են Հայաստանում արդարադատության և կրթական լավ համակարգ ունենալու համար: «Մենք չենք խոսում անձերի, կազմակերպությունների, հիմնադրամների մասին, մենք խոսում ենք հստակ արժեքների, սկզբունքների մասին, և մենք համագործակցում ենք բոլոր նրանց հետ, ովքեր կիսում են այդ արժեքներն ու սկզբունքները»,- շեշտեց նա: Նյութի աղբյուր՝ https://www.tert.am/am/news/2019/11/25/restart/3148137