Հայաստանի Ապագայի Զարգացման Ռազմավարությունե ՀԿ-ի խորհրդի կողմից շնորհավորում ենք Ամանորի և Սուրբ Ծննդյան տոների կապակցությամբ, հայրենիքում բնակվող և աշխարհասփյուռ բոլոր հայրենակիցներին մաղթում ենք երջանկություն և մշտական հաջողություններ, իսկ որպես ազգ՝ միասնականություն և անկոտրում կամք՝ դիմակայելու առկա և հանկարծահաս բոլոր մարտահրավերներին և անխոջ պայքար հանուն հայրենիքի զարգացման և անվտանգ ապագայի։
Հայաստանի Հանրապետության առջև ծառացած մարտահրավերները բազմաթիվ են և բազմաբնույթ. ներքին՝ սոցիալ-քաղաքական, տնտեսական, դեմոգրաֆիկ խնդիրներից մինչև աշխարհաքաղաքական բարդ խնդիրներ կապված տարածաշրջանային զարգացումների, աշխարհի տարբեր երկրներում բնակվող հայությանը սպառնացող վտանգների և բազմաթիվ այլ հարցերի հետ։
Հայ ժողովուրդը արժանի և ունակ է ունենալու բարեկեցիկ, անվտանգ և հզոր հայրենիք, ուժեղ և ամուր պետականություն, մրցունակ հասարակություն, որին ոչ մի օտար ուժ չհանդգնի սպառնալ և փորձել ուժի լեզվով խոսել։
Այդ նպատակով մենք ցանկանում ենք և ձգտում համախմբելու հայրենասեր և ազատ մտածող քաղաքացիներին և բաց ենք համագործակցելու, համատեղ աշխատելու բոլոր այն ուժերի հետ, որոնց նպատակն է Հայաստանի Հանրապետության շարունակական զարգացումը։
Մենք մեր համեստ հնարավորությունների սահմաններում աշխատել և աշխատելու ենք այդ ուղղությամբ։ Հայ ժողովուրդը հազարամյակներ շարունակ պայքարել է բազում արհավիրքների և փորձությունների դեմ, անկախ հայրենիքի կերտման նվիրական երազանքը կյանքի կոչելու գաղափարը մտքում պահած։ Այժմ, երբ ունենք անկախ հայրենիք՝ Հայաստանի Հանրապետություն, պետք է գլուխ չծռել ժամանակի տարատեսակ մարտահրավերների առաջ։
2020 թվականի շեմին, ներքին և տարածաշրջանային բազում մարտահրավերները հաղթահարելու և բարեկեցիկ ապագայի տեսլականով կրկին շնորհավորում ենք մեր բոլոր հայրենակիցների Նոր Տարին և Սուրբ Ծնունդը` մաղթում երջանկություն, հաջողություն և հաղթանակներ։
.jpg)
