Իսրայելի վարչապետ Բենիամին Նեթանյահուն հրաժարվել է Գազայի հատվածում լայնածավալ ցամաքային գործողություն սկսելու մասին հրաման ստորագրել՝ վախենալով, որ դրա ձախողման դեպքում կկորցնի բնակչության վստահությունը։ Այս մասին հայտնում է The New York Times-ը (NYT)՝ հղում անելով հրեական պետության կառավարության աղբյուրներին։

Հրատարակության երկու զրուցակիցների խոսքերով, ովքեր մասնակցել են կառավարության արտակարգ նիստերին, Նեթանյահուն «վրդովեցրել է բարձրաստիճան սպաներին՝ հրաժարվելով ստորագրել ներխուժման ծրագիրը»։ Մերժումը, ըստ աղբյուրների, մասամբ պայմանավորված է վարչապետի ցանկությամբ՝ ստանալու հոկտեմբերի 7-ի հարձակումներից հետո ընդդիմության ներկայացուցիչների հետ ձևավորված արտակարգ իրավիճակների կաբինետի անդամների կողմից այս քայլին միաձայն հավանությունը։

Պարբերականը նշում է, որ Նեթանյահուի մերժումն արտացոլում է նախարարների կաբինետում առկա տարաձայնությունները, որոնցից ոմանք դիտարկում են Գազա ներխուժելու ոչ այնքան հավակնոտ ծրագիր, որը կներառի մի քանի գործողություններ, որոնք կազդեն անկլավի փոքր հատվածի վրա, այլ ոչ թե մեկ՝ լայնածավալ: Ըստ վերլուծաբանների՝ վարչապետը չի շտապում ինքնուրույն հաստատել զինվորականների ծրագիրը՝ մտավախություն ունենալով, որ իր նկատմամբ հանրային վստահության անկման ֆոնին, եթե գործողությունը ձախողվի, կմեղադրեն իրեն։

Հոկտեմբերի 25-ին Axios պորտալը, վկայակոչելով ամերիկացի պաշտոնյաներին, հայտնել է, որ Նեթանյահուն թերահավատորեն է վերաբերվում բանակի հրամանատարության ծրագրերին և վճռական է հետաձգել Գազայի հատվածում ցամաքային գործողության մեկնարկը։ Հրատարակության աղբյուրների համաձայն՝ կառավարության ղեկավարին ժամանակ է պետք՝ լսելու տարբեր տեսակետներ և բանակցողներին ավելի շատ հնարավորություններ ընձեռելու՝ ազատելու պատանդներին, մինչ բանակը պատրաստվում է գործողությանը։