Կահիրեում հնագետների պեղումները հնագույն Հելիոպոլիս քաղաքի տեղում ավարտվել են գրանիտե բլոկների հայտնաբերմամբ, որոնց վրա պահպանվել է Փարավոն Խուֆու (Քեոպս) փորագրված անունը։ Հետաքրքիր գտածոյի մասին հայտնել են Եգիպտոսի զբոսաշրջության եւ հնությունների նախարարության ներկայացուցիչները։

Հելիոպոլիսը մեծ քաղաքի հունարեն անվանումն է, որը գտնվում էր Նեղոսի Իունու հովտում։ Այսօր քաղաքի մնացորդները գրեթե ամբողջությամբ գտնվում են Կահիրեի, Էլ Մատարիայի եւ Այն Շամսի ժամանակակից թաղամասերի տակ, ուստի հնագետներին ուսումնասիրության համար Հելիոպոլիսի միայն փոքր տարածքն է հասանելի:

Հին Հելիոպոլիս քաղաքը ձեւավորվել է նախադինաստիկ ժամանակաշրջանում եւ իրենից արեւի աստվածության պաշտամունքի կենտրոն է ներկայացրել, ինչն այն Արեւի պաշտամունքի վրա հիմնված թագավորության կոնցեպտի կարեւոր վայր է դարձնում։ Դատելով հնագիտական ​​հայտնագործություններից՝ Հին Թագավորության փարավոններն ակտիվորեն կառուցապատում էին Հելիոպոլիսը, սակայն այդ արագ շինարարական գործունեությունից գրեթե ոչինչ չի պահպանվել։

Հնագիտական ​​նոր սեզոնում գիտնականներին բախտ է վիճակվել գրանիտե բլոկների բեկորներ գտնել՝ Գիզայի հայտնի Մեծ բուրգի ստեղծող փարավոն Խուֆու (Քեոպս) անունով: Խոսքը, ինչպես շեշտում են հնագետները, Քեոպսի անունով առաջին գտածոյի մասին է Հելիոպոլիսում։ Ճիշտ է, կա վարկած, որի համաձայն՝ փարավոնի անունով գրանիտե բլոկները կարող էին այլ տեղից այստեղ հայտնվել։